(سبه‌ی):

ده‌زگای فڕۆكه‌وانی مه‌ده‌نی ئێران رایده‌گه‌یه‌نێت؛ به‌شی یه‌كه‌می ڤاكسینه‌ روسیه‌ك ئه‌مڕۆ گەیشتوەتە ئێران و سه‌رۆكی دامه‌زراوه‌ی خوارده‌مه‌نی و ده‌رمانیش ده‌ڵێت: رێژه‌ی كارایی چاره‌سه‌ركردن تیایدا (95%)ـه‌ و له‌لایه‌ن ده‌زگاكه‌یه‌وه‌ پشتگیری به‌كارهێنانی كراوه‌.

محه‌مه‌د حسێن، وته‌بێژی ده‌زگای فڕۆكه‌وانی مه‌ده‌نی ئێران رایگه‌یاند: سه‌عات (3:50) دواى نیوەڕۆى ئه‌مڕۆ به‌كاتی تارانی پایته‌خت، به‌شی یه‌كه‌می ئه‌و ڤاكسینه‌ی ئێران كڕیویه‌تی به‌ئاماده‌بونی به‌رپرسانی وه‌زاره‌تی ته‌ندروستی و ده‌زگای فڕۆكه‌وانی مه‌ده‌نی و به ‌فڕۆكه‌یه‌كی كۆمپانیای ماهانی ئێرانی له‌ روسیاوه‌ گەیشتە ئه‌و وڵاته‌.

وتیشی: "ئەو بڕە لە ڤاكسینه‌ روسییه‌كه‌ کە به (Sputnik V)‌ ناسراوه‌ و ئێران کڕیویەتى به‌سێ كاروان ده‌گاته ئێران‌".

لای خۆیه‌وه‌ كازم جه‌لالی، باڵوێزی ئێران له‌ روسیا رایگه‌یاند: کاروانى دوه‌مى ڤاکسینەکە له‌ (18)ی شوبات و کاروانى سێیه‌میشی له‌ (28)ی شوبات له‌روسیاوه‌ ره‌وانه‌ی ئێران ده‌كرێن.

دوێنێ محەمەد ره‌زا، سه‌رۆكی دامه‌زراوه‌ی خوارده‌مه‌نی و ده‌رمانی ئێران رایگه‌یاندبو، كاروانی یه‌كه‌می ئه‌و ڤاكسینه‌ی له‌ روسیا كڕدراوه‌ (500) هه‌زار دانه‌یه‌ و رێژه‌ی كارایی چاره‌سه‌ركردن تیایدا (95%)ـه‌ و له‌لایه‌ن ده‌زگاكه‌یه‌وه‌ پشتگیری به‌كارهێنانی كراوه‌.

ئەوە لەکاتێکدایە ئێران یەکێکە لەو وڵاتانەى زۆرترین حاڵەتى توشبون و گیانلەدەستدانى بە کۆرۆنا تێدا تۆمار کرا و لە ریزبەندى (16)یەمدایە لەسەر ئاستى جیهان، بەشێوەیەک تائێستا و بەپێى نوێترین ئامار زیاتر لە (یەک) ملیۆن و (455) هەزار حاڵەتى توشبون بە کۆرۆنا لەو وڵاتە تۆمار کراون و لەو ژمارەیەش (58) هەزار و (256) کەسیان بەهۆى کاریگەرییەکانى پەتاکەوە گیانیانلەدەستداوە.