(سبەی):

بزوتنەوەی گۆڕان و یەکێتی نیشتیمانی بەپێوستی دەزانن، بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجە و موچەی و یاسای بودجەی عێراق.

ئەمڕۆ یەکشەممە، کۆبونەوەی لوتکەی بزوتنەوەی گۆڕان و یەکێتی نیشتیمانی کوردستان بەڕێوەچو، لە راگەیەندراوی کۆتایی کۆبونەوەکەدا پێشوازی لەھەنگاوەکانی بەرەوپێشچونی سیستمی لامەرکەزی کارگێڕی و دارایی کرا و هەروەک هاوڕابون لەسەر زەمینەخۆشکردن بۆ کۆبونەوەی لایەنە سیاسیەکانی کوردستان و پەرەپێدانی پەیوەندییەکان بە مەبەستی چارەسەرکردنی ئەو کێشانەی روبەڕوی واقیعی ھەرێم و عێراق دەبێتەوە.

وەفدی بزوتنەوەی گۆڕان بە سەرۆکایەتی عومەر سەید عەلی رێکخەری گشتی و ژمارەیەک لە ئەندامانی خانەی راپەڕاندن و جڤاتی نیشتیمانی لەگەڵ وەفدی باڵای یەکێتی نیشتیمانی کوردستان بە سەرۆکایەتی بافڵ تاڵەبانی و لاهور شێخ جەنگی هاوسەرۆکان و ژمارەیەک لە ئەندامانی مەکتەبی سیاسی یەکێتی نیشتیمانی کوردستان کۆبونەوە و دواتر راگەیەندراوێکی هاوبەشیان بڵاوکردەوە کە ئەمە دەقەکەیەتی:

راگەیاندراوی رۆژنامەوانی

ئەمڕۆ یەکشەممە (29/11/2020) کۆبونەوەی لوتکەی یەکێتیی نیشتمانیی کوردستان و بزوتنەوەی گۆڕان لە دەباشان بەڕێوەچو.

تەوەری سەرەکی کۆبونەوەکە گفتوگۆکردن بو، لەسەر دواین گۆڕانکاری و پێشھاتە سیاسی و ئابورییەکانی ھەرێم و عێراق، بەتایبەت خراپی بژێوی ژیانی ھاوڵاتیان و موچەخۆرانی ھەرێم، کە بەرئەنجامی قەیرانی دارایی و بڵاوبونەوەی ڤایرۆسی کۆرۆنا دروست بوە، دواتریش بەدیارکراوی دوای دەرکردنی یاسای ئەنجومەنی نوێنەرانی عێراق، پەیوەندیدار بە کورتھێنانی بودجە و وەرگرتنی قەرز قەیرانەکە قوڵتربوەتەوە .

سەڕەڕای جەختکردنەوە  لەتوندو تۆڵکردنی پەیوەندی نێوان ھەردولا، بەپێویست زانرا ھەنگاوی کرداری خێرا بۆ چارەسەرکردنی کێشەکان بنرێت، ھەروەک ھاوڕابوین لەسەر ئەم بڕیارانەی خوارەوە:

1- بەپەلە وەفدێکی خاوەن بڕیاری حکومەتی ھەرێم پێکبھێنرێت و بچێتە بەغدا بۆ گفتوگۆکردن لەسەر چارەسەرکردنی ریشەیی و کۆتایی کێشەی بودجە و موچەی ھەرێمی کوردستان، لەھەمانکاتدا ئەم ھەنگاوە ببێتە بناغەیەکی پتەو بۆ یاسای بودجەی (2021)ی فیدڕاڵی.
2- پێشوازی لەھەنگاوەکانی بەرەوپێشچونی سیستمی لامەرکەزی کارگێڕی و دارایی دەکەین، ھەروەک لەکارنامەی کابینەی نۆیەمی حکومەتی ھەرێمدا ھاتوە.
3- زەمینەخۆشکردن بۆ کۆبونەوەی لایەنە سیاسیەکانی کوردستان و پەرەپێدانی پەیوەندییەکان بە مەبەستی چارەسەرکردنی ئەو کێشانەی روبەڕوی واقیعی  ھەرێم و عێراق دەبێتەوە.

یەکێتیی نیشتمانیی کوردستان    بزوتنەوەی گۆڕان