(سبەی):
وتەبێژی بزوتنەوەی گۆڕان رایدەگەیەنێت؛ تیمی وەزاری گۆڕان دەنگی بە بڕینی رێژەی موچە نەداوە و دەشڵێت: ئەگەر لایەنەکانی ئەم کابینەیە کار بۆ کۆتایی هێنان بەو دۆخە داراییە و بەهێزکردنی داهاتی ناوخۆ نەکەن، ئەم نەهامەتیە درێژە دەکێشێت و چاکسازی ناکرێت، ئەوەش پێشێل کردنی بەرنامەی کابینەکەیە.

عەدنان عوسمان، وتەبێژی بزوتنەوەی گۆڕان و سکرتێری جڤاتی نیشتیمانی رایگەیاند دوای ئەوەی دوێنێ دوشەممە (17/8/2020) حکومەتی هەرێم بڕیاری دابەشکردنی موچەی بەداشکاندنەوە دا، ئێمە پێشتر دژ بەو هەنگاوە بوین و پەسەندمان نەکرد، بەڵام بەڵێنی ئەوە درابوکە ئەمە کاتیە و تەنها بۆ یەکجارە، بۆیە تیمی وەزاری گۆڕان هەفتەی رابردو وەک ئەوەی پێشتر بزوتنەوەکەیان بڕیاری دابو، دەنگیان بۆ ئەو رێژەی بڕینە نەدابو.

وتیشی: ‏سەرباری نیگەرانی زۆرمان لەو هەنگاوە و دەستبردن بۆ قوتی موچەخۆران، پێمان وایە جدی نەبون و پەلە نەکردن لە هەنگاوەکانی چاکسازی ریشەیی بە تایبەت لەبوارە گەورەکانی وەک نەوت و دەروازەکان و قاچاخی سەرسنور و موچەخۆری وەهمی و دواکەوتنی رێکەوتنێکی هەمەگیر لەگەڵ بەغدا، هۆکاری سەرەکی ئەو کورتهێنانەن.

وتەبێژی بزوتنەوەی گۆڕان جەخت دەکاتەوە لەوەی ‏ئەگەر لایەنەکانی ئەم کابینەیە بەئیرادەیەکی هاوبەش و خێرا کار بۆکۆتایی هێنان بەو دۆخە داراییە و بەهێزکردنی داهاتی ناوخۆ کە سەرجەمی بڕژێتە خەزینەی حکومەتەوە نەکەن، ئەوا ئەم نەهامەتیە درێژە ئەکێشێت و چاکسازیش ناکرێت، ئەوەش پێشێلکردنی بەرنامەی راگەیەندراو وستراتیژی کابینەکەیە.