(سبەى):
سەرۆکى دیوانى ئەنجومەنى
وەزیران دوپاتى دەکاتەوە کە حکومەت پابەندە بەو کارنامەکەى و ئەو بەرنامە
چاکسازییەى رایگەیاندوە و لە هەوڵەکانى بۆ چاکسازیى بەردەوامە.
ئومێد سەباح، سەرۆکى دیوانى ئەنجومەنى وەزیرانى هەرێم، لە
کۆنگرەیەکى رۆژنامەوانیدا رایگەیاند؛ حکومەتی هەرێمی کوردستان پابەندی ئەو بەرنامە
و ئەجندایەیە کە پێشکەشی پەرلەمان و خەڵکی کوردستانی کردوە کە ئەجندایەکی هاوبەشی
هەمو لایەنە سیاسییەکانی بەشدار لە حکومەتە، بۆیە داواش لە هەمو حیزبەکان و خەڵکی
هەرێمی کوردستان دەکەین پشتیوانی حکومەت بن بۆ جێبەجێکردنی کارنامەکەی و
ئەنجامدانی چاکسازی بۆ ئەوە بتوانێت بە بێ جیاوازی خزمەتی هەمو هاوڵاتی هەرێمی
کوردستان بکات.
لەو
کۆنگرە رۆژنامەوانییەدا، ئومێد سەباح رەتى کردەوە کە حکومەت پابەندى رێککەوتنى
لایەنە پێکهێنەرەکانى نەبێت و ئاماژەى بەوەکرد کە هەوڵەکانى حکومەت بۆ چاکسازى
بەردەوامە و دیاریکردنى یاریدەدەریش بۆ سەرۆکى حکومەت، جگە لەوەى لە دەسەڵاتى
سەرۆکى ئەنجومەنى وەزیرانە کە یاریدەدەر بۆخۆى دیارى بکات، بەڵام دڵنیایى دا لەوەى
کە "یاریدەدەرەکانى سەرۆکى ئەنجومەنى وەزیران نەبونەتە بەدیل و ناشبنە بەدیلى
وەزیرەکان".
هەولێر/ هەژار ئەنوەر