(سبەى):
مەسعود بارزانى رایدەگەیەنێت؛ بەردەوامبونی شەڕ و ئەو دۆخە مەترسیدارە، هەڕەشەیەكی جدییە بۆ سەر ژیانی خەڵك و ئاسایش و "سەقامگیریی كۆی ناوچەكە دەكاتە ئامانج".

ئەمڕۆ شەممە (12/10/2019)، مەسعود بارزانى سەرۆکى پارتى دیموکراتى کوردستان راگەیەندراوێکى لەبارەى هێرشەکەى تورکیا و دۆخى رۆژئاواى کوردستان بڵاوکردەوە و تێیدا هاتوە؛ لە ماوەی رابردو هەوڵی زۆرمان دا كە شەڕ و ناسەقامگیری لە گەلی كورد لە سوریا دور بكەوێتەوە و چیتر نەهامەتی و كارەسات رو نەدەن، بەڵام بەداخەوە لە چەند رۆژی رابردو ناوچە كوردنشینەكانی باكوری سوریا توشی پەلاماردان و دۆخێكی مەترسیدار بونەتەوە.

دەشڵێت: "بەردەوامبونی شەڕ و ئەو دۆخە مەترسیدارە، هەڕەشەیەكی زۆر جدییە بۆ سەر ژیانی خەڵك و ئاسایش و سەقامگیریی كۆی ناوچەكە دەكاتە ئامانج".

هاوکات لە راگەیەندراوەکەدا ئەوەخراوەتەڕو؛ هۆكارەكانی ئەو شەڕە هەرچییەك بوبن و هەر لایەنێك كەمتەرخەم بوبێت یان دەستی لەم دۆخە ترسناكە هەبوبێت، "ئێستا كات، كاتی موزایەداتی بێهودە و بۆچونی عاتیفی و هەڵچون نییە، كاتی ئەوەیە كە هەمو لایەكمان هەرچی هەوڵ و توانامان هەیە بەكاری بهێنین بۆ ئەوەی كۆتایی بەو شەڕە بێت و چیتر خەڵكی بێ تاوان باجی ئەو دۆخە مەترسیدارە نەدەن و رێگەیش لە گۆڕینی دیموگرافیی ئەو ناوچەیە بگیرێت".