(سبەی):

بەهۆى تەقینەوەى گولـلە هاوەنێک لە گوندى سیتکانى سۆران هاوڵاتیەک گیانى لەدەستدا و سێ کەس برینداربون.

نیوەڕۆى ئەمڕۆ چوارشەممە، ژمارەیەک هاوڵاتیى بۆ کۆکردنەوەى ئاسن چونەتە گوندەکەی خۆیان (گوندی سیتکان) لە ناحیەى دیانەى سەر بەقەزاى سۆران، کە پێشتر شوێنى تەقاندنەوە و لەناوبردنى چەک و تەقەمەنى بوە، گولـلە هاوەنێک پێیاندا تەقیوەتەوە و دەستبەجێ یەکێک لەو هاوڵاتییانە بەناوى (محەمەد خدر) تەمەن (47) ساڵ گیانی لەدەستداوە و سێ کەسى دیکەش بریندار بون.

بەوتەی جومعە عەبدوڵا، کە یەکێکە لە بریندارەکان و لە نەخۆشخانەى ئاشتى قەزاى سۆران چارەسەر وەردەگرێت، بە (سبەی) راگەیاند: لە نزیک گوندەکەى خۆیان سەرقاڵی کۆکردنەوەی ئاسن بون و لەناکاو گولـلە هاوەنێک بە مامیاندا تەقیوەتەوە و ئەوانیش برینداربون.

وتیشی :"ئەو شوێنە مین و تەقەمەنى لێ نییە و باوەڕیش ناکات مامى دەستکاریى گولـلە هاوەنەکەی کردبێت".

پەیامنێری (سبەی) رایگەیاند: دوان لە بریندارەکان لە نەخۆشخانەى ئاشتى قەزاى سۆران چارەسەر وەردەگرن و بارى تەندروستییان جێگیرە، بەڵام بریندارەکەى دیکە بەهۆی خراپیی بارى تەندروستییەوە رەوانەى نەخۆشخانەى فریاکەوتنی رۆژئاواى هەولێر کراوە.

برای دوان لە بریندارەکان راستى روداوەکەی بۆ (سبەی) ئاشکرا کرد و رایگەیاند: مام و براو ئامۆزاکەى بەمەبەستى کۆکرکردنەوەى ئاسن چونەتە ئەو شوێنەو لەوکاتەدا ئەو گولـلە تۆپە پێیاندا تەقیوەتەوە و بەهۆیەوە مامیان گیانی لەدەستداوە و دو براکەى و یەکێک لەئامۆزاکانى برینداربون.

سەبارەت بە روداوەکەش، پۆلیسى سۆران رایگەیاند: بەهۆى تەقینەوەى گولـلە هاوەنێک کەسێک گیانی لەدەستداوە و سێ کەسی دیکە برینداربون و هۆکاری روداوەکەشی گەڕاندوەتەوە بۆ ئەوەی کە ئەو هاوڵاتییانە دەستکارییان کردوە.

بەپێی ئامارێکی دەزگای گشتی کاروباری مین لە هەرێمی کوردستان، ساڵی (2018) بەهۆی مین و تەقەمەنییەوە (35) کەس بونەتە قوربانی لەو ژمارەیەش (21) كەس گیانیان لەدەستداوە و (14)ی دیکەش بریندار و كەم ئەندام بون بەراورد بە ساڵی (2017) کە تەنها (23) قوربانیی هەبوە، ژمارەکە زۆر زیادی کردوە.

سۆران/ ئامانج ئەحمەد