(سبەی):
بازگەکانی پارتی رێگریی لە رێکخراوەکانی ژنان و گەنجان دەکەن بچنە ناوچە برادۆست، بۆ گردبونەوە و ناڕەزایەتی دەربڕین دژی سنور بەزاندنی هەرێمی کوردستان لەلایەن تورکیاوە.

پەیامنێری (سبەی) لەوەرتێ رایگەیاند: سەعات دوی دوانیوەڕۆی ئەمڕۆ شەممە، لەبازگەی گۆجاڕی ئاسایشی پارتی لەسنوری بەڕێوەبەرایەتی ناحیەی وەرتێ، رێگری کرا رێکخراوی ژنانی ئازادی کوردستان و گەنجانی وڵاتپارێزی نزیک لە پارتی کرێکارانی کوردستان، بچنە دەڤەری برادۆست.

رایگەیاند: بڕیاربو گەنجانی وڵاتپارێز و رێکخراوی ژنانی ئازادی کوردستان رۆژی (22)ی نیسان لەگەڵ دانیشتوانی دەڤەری برادۆست بەشداری لەگردبونەوەیەک بکەن بۆ ئیدانەکردنی سنوربەزاندنی سوپای تورکیا بۆ ئەو ناوچەیەی هەرێمی کوردستان.

پەیامنێری (سبەی)، وتی :"کاتێک گەنجان و ژنان گەیشتونەتە بازگەی گۆجاڕ کارمەندانی ئاسایش رێگەیان لێدەگرن و دەڵێن نابێت لێرەوە بچنە برادۆست، ئەوەش دەبێتە هۆی  دروست بونی دەمەقاڵێ و لەئەنجامدا ئاسایشی بازگەکە تەقەیان بەسەردا دەکەن و ئەوانیش بەبەرد وەڵامیان دەدەنەوە، بەڵام هیچ زیانێک لەتەقە و شەڕەبەردەکە نەکەوتەوەتەوە.

ناحیەی وەرتێ- ئامانج وەرتێ