(سبەى):
دواى بەرز بونەوەى بەردەوامیى نرخى نەوت لەماوەى رابردودا، ئەمڕۆ نرخی نەوت لە بازاڕەکانی جیهان دابەزینی بەرچاوی بەخۆیەوە بینی و له‌ (9%)ی بەهاکەى لەدەستدا.

هەرچەندە ئەمڕۆ هەینى نرخى یەک بەرمیل نەوتى خاوى برینت بە (63) دۆلار و (14) سەنت مامەڵەى پێکرا، بەڵام ئەو نرخە دواى لەدەسدانى (9%)ى بەهاکەى دێت کاتێک لە (68) دۆلارەوە بۆ (62) دۆلار دابەزى.

هاوکات نرخى یەک بەرمیل نەوتی خاوی تەکساس لەئێستادا (59.89) دۆلارە.

هاتنى کۆرۆنا و راگەیاندنى کەرەنتینە و قەدەغەى هاتوچۆى نێوان وڵاتان نرخى نەوتى نزیک لە سفر کردەوە، بەڵام لەدواى دۆزینەوەى ڤاکسینى کۆرۆنا بەشێوەیەکى بەردەوام نرخى نەوت بەرز بوەوە تا گەیشتە (68) دۆلار و دابەزینی دوبارەشى بۆ (62) دۆلار نزمترین ئاستە لە (16)ی شوباتی ئەمساڵەوە.