(سبەی):
سزاکانی ئەمەریکا بۆسەر ئێران کەرتی گەشتیاری لە ناوخۆی ئەو وڵاتە بوژاندوەتەوە، بە جۆرێک ئێستا هاوڵاتیانی ئێران کەمتر دەچنە دەرەوەی وڵات و زیاتر سەردانی ناوچە گەشتیارییەکانی خۆیان دەکەن.

ئاژانسی بلومبێرگ لە راپۆرتێکدا ئاماژەی بەوەکردوە، کەرتی گەشتیاریی ناوخۆی ئێران بەرەو بوژانەوە دەچێت، بەتایبەت دوای سزاکانی ئەمەریکا و دابەزینی بەهای تمەنی ئێرانیی، کە وایکردوە هاوڵاتیانی ئێران بۆ گەشتکردن رو لە دەرەوەی وڵات نەکەن.

فالی تەیموری، جێگری بەڕێوەبەری کاروباری گەشتیاری لە رێکخراوی کەلتوری رۆشنبیری و پیشەسازی دەستیی رایگەیاندوە، بەرنامەی گەشتە نێودەوڵەتییەکان بە رێژەی (60٪) دابەزیوە و بە پێچەوانەوە خواست لەسەر سەردانیکردنی ناوچە گەشتیارییەکانی ناوخۆی ئێران زیادیکردوە.

هاوکات دەستەی هۆتێلەکانی ئێران ئاماژەی بەوەکردوە، کە ناوچەکانی باشوری ئێران وەکو (قیشم و کرمان و دورگەی کیش) رێژەیەکی زۆر لە گەشتیار لەمساڵدا سەردانیان کردوە، بەتایبەتیش دورگەی کیش کە بەهۆی جوانی سروشتەکەیەوە سەرنجی زۆری گەشتیارانی بەلای خۆیدا راکێشاوە، کە جگە لە گەشتیاری ئێرانی، لە هەرێمی کوردستان و ناوچەکانی عێراقیشەوە گەشتیاران روی تێدەکەن.