(سبەی):
عێراق دەیەوێت لەبەرامبەر هەناردەکردنی بەروبومە خۆراکییەکان بۆ ئێران، وزە و غاز لەو وڵاتەوە وەربگرێت بۆ ئەو مەبەستەش چاوەڕێی رەزامەندی ئەمەریکایە.

ئاژانسی رۆیتەرز لەزاری بەرپرسانی عێراقەوە ئاشکرای کرد، هەردو حکومەتی عێراق و ئێران رێککەوتن لەسەر ئاڵوگۆڕی بەروبومە خۆراکییەکانی عێراق بەرامبەر بە غاز و وزە.

ئاژانسەکە ئاماژەی بەوەشکردوە، بەغدا ئێستا دەیەوێت رەزامەندی ئەمەریکا بەدەست بهێنێت بۆ ئەوەی رێگەی بدات غازی سروشتی لە ئێرانەوە هاوردە بکات و بۆ وێستگەکانی کارەبا بەکاری بهێنێت.

رۆیتەرز ئەوەشی ئاشکراکردوە، ماوەیەکی زۆری دەوێت تا عێراق سەرچاوەی جێگرەوەی دەستدەکەوێت، هەر بۆیە هەردولا رێککەوتن لەسەر ئەوەی بەروبومە خۆراکییەکان رەوانی تاران بکرێت  و بەرامبەریشدا ئەو وڵاتە غاز و وزەی کارەبا.

ماوەی (10) رۆژە بەشی دوەمی سزا ئابورییەکانی ئێران چونەتە بواری جێبەجێکردنەوە کە خۆی دەبینێتەوە لە کەرتەکانی وزە و داریی، بەرپرسانی ئەمەریکاش دەڵێن: ئێران دەبێت رەفتاری خۆی بگۆڕێ و دەستبەرداری بەرنامە ئەتۆمییەکەی بێت.

لەبەرامبەریشدا ئێران رەتیدەکاتەوە لەژێر هیچ فشارێکدا بچێتە ژێر داواکانی ئەمەریکا و داوا دەکات رێککەوتنێکی نوێ لەسەر بەرنامە ئەتۆمییەکە دابڕێژرێت.