(سبەی):

دوای گیانلەدەستدانی بە ڤایرۆسی کۆرۆنا، شاجوانی پێشوتری ڤێرجینیا گەڕایەوە بۆ ژیان و دڵی دەست بە لێدان کردەوە.

رۆژنامەی نیویۆرک پۆست بڵاوی کردەوە؛ باربێرا گۆسری تەمەن (82) ساڵ و شاجوانی پێشوتری ڤێرجینیا، دوای توشبونی بە ڤایرۆسی کۆرۆنا لە سەری ساڵدا دڵی لەلێدان کەوت و هەواڵی مردنی بڵاوکرایەوە، بەڵام دوای ماوەیەک بەشێوەیەکی سەرسوڕهێنەر ژیانی بۆ گەڕایەوە و لە مردن رزگاری بو.

باربێرا کە ساڵی (1958) وەک شاجوانی ڤێرجینیا هەڵبژێردرابو، رۆژی (20)ی کانونی یەکەم بەهۆی توشبونی بە ڤایرۆسی کۆرۆنا و دروستبونی کێشەی هەناسەدان گواسترایەوە بۆ نەخۆشخانە و خرایە ژێر چاودێریی چڕەوە، دوای دو رۆژ مانەوە دڵی لە لێدان کەوت و هەواڵی مردنی بڵاوکرایەوە.

یەکەم کەس کە هەواڵەکەی بڵاوکردەوە تۆم کیلی کوڕی بوە کە پزیشکە، پەیوەندی بە تۆنی لای هاوسەری دایکییەوە کرد و هەواڵی مردنی پێڕاگەیاند، بەڵام دوای چەند خولەکێک جارێکی دیکە کیلی پەیوەندییەکی لە نەخۆشخانەوە پێگەیشت و پێیانڕاگەیاند باربێرا دڵی لێدەدات و ژیانی بۆ گەڕاوەتەوە.

هاوسەری باربێرا رایگەیاند: دوای پەیوەندی دوەم، لە ژیانێکی دیکەوە گەڕامەوە، لە کەسێکی دڵتەنگ و شکاوەوە گۆڕام بۆ کەسێکی دڵخۆش.