(سبەى):
وەزیرى دەرەوەى چین دەستپێشخەریەک بۆ چارەسەر لە رۆژهەڵاتى ناوەڕاست پێشنیار دەکات کە لە پێنج خاڵى سەرەکیی پێکهاتوە.

لە نۆیەمین کۆبونەوەى کۆڕبەندى هاریکارى (عەرەبیی – چینی)، وانگ نی وەزیرى دەرەوەى چین پێشنیازێکى پێنج خاڵى لەبارەى بەهێزکردنى ئاسایش و سەقامگیریی و گەشەپێدان لە رۆژهەڵاتى ناوەڕاست خستە بەردەم وەزیرانى دەرەوەى عەرەب و ئامادەیی وڵاتەکەى نیشاندا بۆ هاوکاریکردنى وڵاتانى رۆژهەڵاتى ناوەڕاست لە تێپەڕاندنى کێشەکانیان و بونیادنانى رۆژهەڵاتێکى سەقامگیرو پێشکەوتو.

وەزیرى دەرەوەى چین لەو کۆبونەوەیەدا کە بەشێوەى ڤیدیۆ کۆنفرانس ئەنجامدرا رایگەیاند "سەقامگیریی و ئارامیی لە جیهاندا بەبێ ئارامیی و سەقامگیریی لە رۆژهەڵاتى ناوەڕاست بەدى نایەت" جەختیشى لە ئامادەیی وڵاتەکەى کردەوە بۆ هاوکاریکردنى رۆژهەڵاتى ناوەڕسات لە پێناو تێپەڕاندنى کێشەکان و بەرەو پێشبردنى ئەم ناوچەیە.

دەستپێشەخەریەکەى چین بریتیە لە؛ رێزگرتنى یەکتر، پابەندبون بە داد پەروەریی و یەکترخوێندنەوە، پابەندبون بە رێگریی کردن لە بڵاوبونەوەى چەکى ئەتۆم، کارکردنى پێکەوە بۆ جێبەجێکردنى ئاسایشى کۆمەڵایەتى، خێرا کردنى ئاڕاستەى کارکردن بۆ گەشەپێدان.

وانگ نى، وتیشى:"دەبێت گەلانى ئەم ناوچەیە بەدەستى خۆیان دوا رۆژى خۆیان بونیاد بنێن و وڵاتەکانیان بەڕێوەبەرن."

داواشى لە  وڵاتانى زلهێزى جیهان کرد دەستهەڵگرن لە سیاسەتى دەستوەردان لە کاروبارى رۆژهەڵاتى ناوەڕاست و لێگەڕێن "گەلان بە ئیرادەى خۆیان وڵاتەکانیان بەڕێوەبەرن."
هەروەک جەختى کردەوە لەوەى وڵاتەکەى وەک ئەندامێکى سەرەکیى لە ئەنجومەنى ئاسایشى نێودەوڵەتى کار بۆ پارێزگارى لە سیستمى ئێستاى بەڕێوەبردنى جیهان دەکات.