(سبەی):
رێکخراوی کۆچی نێودەوڵەتی سەر بە نەتەوە یەکگرتوەکان ئاشکرای دەکات، تەنها لەساڵی رابردودا (2276) کەس لەکاتی هەوڵدانیان بۆ گەیشتن بە ئەوروپا لەرێگەی ئاوییەوە، خنکاون.

لە بەیاننامەیەکدا کە ئەمڕۆ هەینی (26/3/2021) بڵاوکراوەتەوە، رێکخراوی کۆچی نێودەوڵەتی سەر بە نەتەوە یەکگرتوەکان ئاماژەی بەوەکردوە، بەپێی ئامارەکانیان تەنها لە ساڵی رابردودا (86) هەزار و (448) کۆچبەر لەرێگەی ئاوەوە گەیشتونەتە کیشوەری ئەوروپا و رێگریش لە (52) هەزار کۆچبەر کراوە لە هەمان رێگەوە.

وتیشی: (2276) کۆچبەر لەکاتی گەیشتن بۆ ئەوروپا لە دەریادا خنکاون کە زۆربەیان لە نزیک دورگەی (کەناری) ئیسپانیا بوە.

رێکخراوی کۆچی نێودەوڵەتی دەڵێت: ژمارەی کۆچبەرە خنکاوەکان لەوە زیاترە کە ئاماژەی پێکراوە و چەندین حاڵەتی نقومبونی کەشتی کۆچبەر هەبون، کە نەتوانراوە هیچ تەرمێک تێیدا بدۆزرێنەوە.

رێکخراوەکە ئاماژەی بەوەشکردوە، لە ساڵی (2014)ەوە تائێستا و بەپێی ژمارە فەرمییەکان، (22) هەزار کۆچبەر لە چوار رێگای سەرەکییەوە کە هەوڵی گەیشتن بە ئەروپایان داوە، خنکاون.