له‌ وه‌ته‌ی ‌هه‌ردووحکومه‌تی سه‌وز و زه‌رد به‌خێرێ یه‌کیانگرتۆته‌وه‌، گله‌یی و گازه‌نده‌ی هاووڵاتییان زیادیکردووه‌، خه‌ڵک دادوبێدادیانه‌ به‌ده‌ست که‌مته‌رخه‌می و خه‌مساردی کاربه‌ده‌ستانی وڵاته‌‌وه. خه‌مساردی به‌رامبه‌ر پێداویستییه‌ سه‌ره‌تاییه‌کانی ژیانی رۆژانه‌ی خه‌ڵک‌:‌ کاره‌با، ئاو، نه‌خۆشخانه‌، رێگاوبان، تا ده‌گاته‌ ئیشوکاره‌ ئیدارییه‌کانی هاووڵاتییان. رۆتین، به‌رتیل و خزمخزمێنه‌ ئه‌مانه‌ پێکه‌وه‌ بڕستیان له‌ هاووڵاتییان بڕیوه. هه‌ر ده‌نگێکیش بۆ چاک و باشکردنی ئه‌م پاشا گه‌ردانییه‌ به‌رزده‌بێته‌وه‌، رووبه‌ڕووی ناووناتۆره‌ی: تاپوری پێنج و ده‌ستی دووژمنان و ره‌خنه‌گری به‌رسێبه‌ر و چی و چی ده‌بێته‌وه‌!
که‌ باسیش دێته‌ سه‌ر حکومه‌تی ناوه‌ند داوای فیدراڵی و دیاریکردنی ده‌سه‌ڵاتی ناوه‌ند و زیادکردنی ده‌سه‌ڵاتی هه‌رێمه‌کان ده‌که‌ن.

له‌ هه‌رێمیش گه‌ر داوای دابه‌شکردنی ده‌سه‌ڵاتیان لێبکه‌ی ده‌ڵێن ئه‌وه‌ بڤه‌یه‌ و به‌زاندنی خه‌ته‌ سورو شین و مۆره‌کانه‌! پێیانوایه‌ له‌ شانوشه‌وکه‌تیان که‌مده‌که‌یته‌وه‌!
ئه‌م جۆره‌ حه‌زکردنه‌ له‌ کۆکردنه‌وه‌ی ده‌سه‌ڵات له‌سه‌ری هه‌ڕه‌مه‌کاندا، دوورنییه‌ بۆ جۆرێک له‌ گرێ و نه‌خۆشێ حه‌زکردن به‌ چڕکردنه‌وه‌ی ده‌سه‌ڵات لای لێپرسراوه‌ باڵاکان بگه‌ڕێته‌وه‌! گه‌ر وابێت ئاو وهه‌وای دروستکردنی دیکتاتۆرییه‌ت له‌ ئارادایه‌.
که‌ باسی هێنانی چه‌ند وه‌زاره‌تێکیش بۆ شارێکی وه‌ک سلێمانی ده‌کرێت یه‌کسه‌ر به‌ بیانوی ئه‌وه‌ی که‌ هه‌ولێر پایته‌خته ‌و پایته‌ختیش شوێنی خڕکردنه‌وه‌ی پارله‌مان و سه‌ری حکومه‌ته‌ ده‌مکوتت ده‌که‌ن‌!!

بۆ وه‌ڵامدانه‌وه‌ی ئه‌م پرسیاره:‌ ئایه‌ راسته‌ پارله‌مان و حکومه‌ت ده‌بێت هه‌ر له‌پایته‌ختدابن؟
هه‌وڵده‌ده‌م به‌شێنه‌یی و دوور له‌هه‌ر جۆره‌ ته‌نگه‌نه‌فه‌سییه‌کی شارچێتی و پشتبه‌ستن به‌ ژماره‌ و داتا ئه‌م بابه‌ته‌ بوروژێنم. هاوکات داوا له‌ نووسه‌ران، رۆشنبیران، پارله‌مانتاران، وه‌زیره‌ به‌ڕیزه‌کان و سیاسییه‌کانی وڵاته‌که‌م ده‌که‌م به‌شداری له‌م گفتوگۆیه‌دابکه‌ن بۆ ده‌ستخستنی ئه‌نجامێکی باش.
به‌بڕوای من سسیستمی ئیداریی وحکومڕانی له‌کوردستاندا له‌ بنچینه‌وه‌ خوار و سه‌قه‌ته‌‌، بۆیه‌ هه‌رچی له‌سه‌ر بینا بکرێت هه‌ر به‌خواری به‌رز ده‌بێته‌وه‌،‌ تا به‌زتریشیکه‌یته‌وه‌ زووتر ده‌ڕوخێت، ئه‌مه‌ش وه‌ک ئه‌وه‌ وایه‌ که‌سێک کۆمپیته‌ر( هاردوێر) ێکی زۆر کۆنی هه‌بێت و بیه‌وێت تازه‌ترین پرۆگرام ( سۆفت وێر)ی بخاته‌ سه‌ر و به‌ته‌ماش بێت ئیشیپێبکات! دیاره‌ له‌م حاڵه‌ته‌دا بێگۆڕینی هاردوێره‌که‌ ئیشپێکردنی پرۆگرامه‌ نوێیه‌که‌ کارێکی مه‌حاڵه‌!. بۆیه‌ ده‌بێت هه‌موو هه‌وڵه‌کان بۆ گۆڕین و پێشختنی سیستمه‌ ئیدارییه‌که‌ بخرێته‌ گه‌ڕ.

ئه‌م هه‌وڵه‌ی من به‌شداریکردنێکی بچکۆلانه‌یه‌‌ لانی که‌م بۆ راستکردنه‌وه‌ی تێگه‌یشتنێکی هه‌ڵه‌ی کاربه‌ده‌سته‌ زله‌کانی وڵاته‌که‌م که‌ پێیانوایه‌ قانوونی ته‌بیعه‌ته‌ و ده‌بێت هه‌موو ده‌وڵه‌ت له‌پایته‌ختدا کۆبکرێته‌وه‌!
ئه‌گه‌ر چاوێک به‌ دنیادا بگێڕین گه‌لێک نموونه‌مان به‌رچاوده‌که‌وێت که‌ پایته‌ختی وڵاته‌که‌ ئاڵوگۆڕی پێکراوه،‌ واته‌ تا ئه‌مڕۆ ئێره‌ پایته‌خت بووه‌، به‌یانی شارێکی تری وڵاته‌که‌. کورد وته‌نی پایته‌خت ناوێک نییه‌ به‌ قیروزفت به‌ شارێکه‌وه‌ نووسێنرابێت و لێی نه‌بێته‌وه‌.
له‌ دنیادا نموونه‌ی به‌رچاویشمان هه‌یه‌ که‌ داموده‌زگاکانی ده‌وڵه‌ت له‌ پایته‌ختی وڵاته‌که‌دا نین، هه‌ر چۆن نموونه‌شمان هه‌یه‌ که‌ داموده‌زگاکانی ( پارله‌مان، حکومه‌ت) دابه‌شبوون به‌سه‌ر پایته‌خت و شاره‌کانی تری وڵاته‌که‌دا. دیاره‌ نموونه‌ی وڵاتی بێ پایته‌ختیشمان هه‌یه‌!

بۆ روونکردنه‌وه ‌و پیشاندانی ئه‌و‌ سێ حاڵه‌ته‌ی سه‌ره‌وه‌ په‌نا بۆ‌ چه‌ند خشته‌یه‌ک ده‌به‌م:
بۆ زانینی ناوی هه‌ندێک له‌و وڵاتانه‌ی حکومه‌ت له‌پایته‌ختدا نییه‌، یان هه‌ر پایته‌ختیان نییه، سه‌یری خشته‌ی 1 بکه‌:

خشته‌ی (1)

شوێنی داموده‌زگای ده‌وڵه‌ت	پایته‌خت/فه‌رمی	وڵات
ده‌نهاخ ( لاهای)	ئه‌مستردام	هۆڵاند
کۆتۆنیۆ	پۆرتۆنۆفۆ	بێنین
سیوکرێ	له‌پاز	بۆلیفیا
ئه‌بیدجان	یامۆیسۆکرۆ	ئیفۆرکوست
مۆناکۆفیللێ	نییه‌تی	مۆناکۆ
یارێن	نییه‌تی	ناورو
نانکینگ	تیاپی	تایوان
دارالسلام	دۆدۆما	تانزانیا
بێرن	نییه‌تی	سویسرا
	ناوه‌کان به‌ هؤلآندی
Den Haag	Amsterdam	Holland
Cotonou	Porto-Novo	Benin
La Paz	Sucre	Bolivia
Abidjan	Yamoussoukro	Ivoorkust
Monaco-Ville	نییه‌تی	Monaco
Yaren	نییه‌تی	Nauru
Facto	Taipei	Taiwan
Dar es Salaam	Dodoma	Tanzania
Bern	نییه‌تی	Zwitserland

بۆ زانینی ناوی هه‌ندێک له‌و وڵاتانه‌ی پایته‌خته‌کانیان گواستراوه‌ته‌وه،‌ سه‌یری خشته‌ی (2) بکه‌:

   ناوه‌کان به‌ کوردی

ساڵی گواستنه‌وه‌	پایته‌خت بۆ	پایته‌خت له‌	وڵات	پایته‌خت بۆ	پایته‌خت له‌	ووڵات
2006	میلیکۆک	كۆرۆ	پالاو	Melekeok	Koror	Palau
2005	نایپیداو	رانگۆن	میانمار	Naypyidaw	Rangoon	Myanmar
1997	ئه‌ستانه‌	ئه‌لمائتا	کازاخستان	Astana	Alma-Ata	Kazachstan
1996	دۆدۆما	دارئلسلام	ته‌نزانیا	Dodoma	Dar es Salaam	Tanzania
1991	ئه‌بوجا	لاگۆس	نایجیریا	Abuja	Lagos	Nigeria
1990	به‌رلین	بۆن	ئه‌ڵمانیا	Berlijn	Bonn	Duitsland
1983	یامۆیسۆکرۆ	ئه‌بیدجان	ئیفۆرکوست	Yamoussoukro	Abidjan	Ivoorkust
1964	به‌رازیلیا	ریۆدجانیرۆ	به‌رازیل	Brasilia	Rio de Janeiro	Brazilié
1946	تیتۆگراد	سێتینجه‌	مۆنتینێگرۆ	Titograd	Cetinje	Montenegro
1923	ئه‌نکه‌ره‌	کۆنستانینۆپێڵ	تورکیا	Ankara	Constantinopel	Turkije
1917	مۆسکۆ	سینتپیتروسبورگ	روسیا	Moskou	Sint-Petersburg	Rusland
1870	ڕۆما	فلۆرانس	ئیتالیا	Rome	Florance	Italié
1868	تۆکیۆ	کیۆتۆ	یابان	Tokio	Kyoto	Japan
1864	فلۆرانس	تورژن	ئیتالیا	Florence	Turijn	Italié
1834	ئه‌سینا	ناوپلیۆن	یۆنان	Athene	Nauplion	Griekenland
1812	هێلسنکی	تورکو	فینلاند	Helsinki	Turku	Finland
1808	ئه‌مسته‌ردام	ده‌نهاخ بۆ ئیوترێخت بۆ	هۆڵاند	Amsterdam	Den Haag -Utrecht	Holland
1596	وارشۆ	کراکاو	پۆلۆنیا	Warschau	Krakau	Polen

له‌ خشته‌ی ژماره‌ 2 دا بۆمان ده‌رده‌که‌ویت که‌ بوونی شارێک به‌ پایته‌ختی وڵاتێک مانای ئه‌وه‌نییه‌ که‌ تیَکستی په‌ڕتوکه‌ ئاسمانییه‌کانه ‌و هه‌رکه‌س باسی ده‌ستکاریکردن وگۆڕینی بکات ئیتر له‌ دین وه‌رده‌گه‌ڕێت.
ئه‌وه‌ به‌رژه‌وه‌ندی ولاته‌که و هونه‌ری به‌ڕیوه‌بردنی وڵاته‌ بڕیارده‌ده‌ن ده‌زگا و دامه‌زراوه‌ کرنگه‌کانی ده‌وڵه‌ت له‌کوێ بن، نه‌ک ململانێی حزبی، نه‌ک وه‌ک هه‌ندێک له‌ مه‌سوله‌کانی له‌مه‌ڕخۆمان پێیانوایه‌ مادام ئه‌و شاره‌ ناوی پایته‌خته‌ ده‌بێت هه‌مزه‌ ئاغابێت!

ئه‌و خشته‌یه‌ی سه‌ره‌وه‌ ده‌توانێت وه‌ڵامی گه‌لێک له‌ پرسیاره‌کانمان بداته‌وه‌.
دیاره‌ ئیشی ئه‌م داتایانه‌ش نابێت به‌ سه‌رپێی تێیانبڕوانین به‌ڵکه‌ ده‌هێنیَت قسه‌وباسی زیاتری له‌سه‌ر بکریت.
به‌و هیوایه‌ی ئه‌وانه‌ی ئه‌هلی ئه‌م بابه‌تانه‌ن خه‌مێکی لێبخۆن!

دیاره‌ مێژوی وڵاتان گه‌لیک نموونه‌ی ترمان ده‌ده‌نێ که ته‌لاری پارله‌مان و ته‌لاری حکومه‌ت به‌سه‌ر پایته‌خت و شاره‌کانی تری وڵاتێکدا دابه‌شبوون. بۆ زانیاری زیاتر سه‌یری خشته‌ی ژماره‌ (3) بکه‌:

شار/ وه‌زاره‌ت	شار/ حکومه‌ت	شار/ پارله‌مان	پایته‌خت/حکومه‌ت	پایته‌خت/ پارله‌مان	پایته‌خت/هه‌ردووکیان	وڵات
		فاڵپارایسۆ	سانتیاگۆ			چیلی
بۆن					به‌رلین	ئه‌ڵمانیا
		کیوزۆنسیتی	مانیلا			فیلیپین
			یورشه‌لیم			ئیسرائیل
	پوترا‌جایا			کوالالامپور		مالیزیا
		کۆتته‌	کۆڵۆمبۆ			سیریلانکا
	پرێتۆریا	کاپستاد				باشوری ئا‌فریکا

تێبینی: وه‌زاره‌تی داد له‌ باشوری ئه‌فریکا له‌ شاری ( Bleomfontein) ی وڵاته‌که‌یه‌.

ئه‌و نموونانه‌ی سه‌ره‌وه‌ ده‌کرێت ده‌رس و په‌ندیان لێوه‌ربگیرێت. ئه‌وه‌ی له‌ وڵاتی خۆمان تێبنی ده‌که‌م هه‌رکه‌سێک باس له‌ دابه‌شکردنی ده‌سه‌ڵات بکات، هه‌رکه‌سیک باسی گواستنه‌وه، یان هیچ نه‌بێت دابه‌شکردنی وه‌زاره‌ته‌کان به‌سه‌ر شاره‌کاندا بکات ئه‌گه‌ر پارتی سه‌رۆکی حکومه‌تی به‌ده‌ستبێت، وای لێکده‌داته‌وه‌ بۆ دژایه‌تی ئه‌وه‌. یه‌کێتیش به‌هه‌مان لۆژیک بیرده‌کاته‌وه‌.
ئێستا که‌ باسی ده‌ستور و ده‌سه‌ڵاته‌کانی سه‌رۆکی هه‌رێم ده‌که‌یت، باسی ئه‌وه‌ ده‌که‌یت که‌ ئه‌م ده‌ستوره‌ بۆ سیستمی سه‌رۆکایه‌تی نووسراوه‌ نه‌ک بۆ سیستمێکی پارله‌مانی فره‌یی، یه‌کسه‌ر به‌ر نه‌فره‌تی برایانی پارتی ده‌که‌ویت، وا ده‌زانن ئه‌م ده‌ستوره‌ ته‌نها بۆ ماوه‌ی سه‌رۆکایه‌تییه‌که‌ی کاک مه‌سعود بارزانی یه‌! یان ده‌بێت پێیانوابێت که‌ ئه‌م سه‌رۆکایه‌تییه‌ تاپۆی ره‌شی عوسمانلی یه ‌و له‌سه‌ر ئه‌وانه‌!! بێگومان به‌ دیوه‌که‌ی تریدا ئه‌گه‌رله‌ جیاتی کاک مه‌سعود مامجه‌لال ئێستا‌ سه‌رۆکی هه‌رێم بوایه‌ هه‌رئه‌و وه‌ڵامانه‌مان گوێ لێده‌بوو!
ئه‌م لۆژیکی بیرکردنه‌وانه‌ن که‌ مه‌ترسی جددی له‌سه‌ر ئاینده‌ی نه‌ته‌وه‌که‌مان داده‌نێن!

ئێستاش که‌ ده‌ڵیێت له‌ سایه‌ی یه‌کگرتنه‌وه‌ی حکومه‌تی هه‌رێمدا، شارێکی گه‌وره ‌و گرنگی وه‌ک سلێمانی کارکه‌نار کراوه‌، له‌ جیاتی سیمای شار، هی شارۆچکه‌ی گرتووه‌، له‌ جیاتی پرۆژه‌ی سه‌نعه‌تی ستراتیجی هه‌ر بینای کۆنکریتییه‌و بێ ره‌چاوکردنی سیما و رووخساری شار به‌ ئاسماندا ده‌چیت! که‌ ده‌ڵێیت با وه‌زاره‌ته‌کان له‌ سلێمانی و پارله‌مان له‌ هه‌ولێر، یان به‌ پێچه‌وانه‌وه‌ بێت!
ئیتر له‌لایه‌ن هه‌ردوولاوه‌ ده‌که‌ویَته‌ به‌ر ره‌حمه‌تی تانه‌وته‌شه‌ر.

یه‌کێکیان ده‌ڵیت ئه‌وه‌ ده‌ستی ناحه‌زانه‌ و چاویان به‌م هه‌موو ده‌سکه‌وت و یه‌کگرتنه‌وه‌یه‌دا هه‌ڵنایه‌ت. هه‌شیانه‌ به‌ ته‌که‌تولچی و له‌پاڵیشیا به‌ شارچێتی تاوانبارت ده‌که‌ن. که‌سانێکی تریش به‌وه‌ی گوایه‌ ئه‌م ده‌نگانه‌ چاویان به‌و نازونیعمه‌ته‌ی هه‌ولێردا هه‌ڵنایه‌! خه‌ڵکه‌ موهیمه‌کانیش باس له‌وه‌ده‌که‌ن پایته‌خت له‌کوێ بێت ده‌بێت ده‌وڵه‌ت له‌وێ بێت و به‌ له‌خۆ رازیبونیشه‌وه‌ ده‌ڵیَن ئه‌وه‌ له‌ هه‌موو دنیا دا وایه‌!

پێموایه‌ ئه‌و نموونانه‌ هێنده‌ی ئه‌وه‌ن که‌ ئه‌و به‌ڕیزانه‌ی له‌ڕووی که‌می زانیارییه‌وه‌ رایه‌کی وایان هه‌بوو بێت، بیگۆڕن.
ئه‌گه‌رسه‌ره‌ک وه‌زیرێک، وه‌زیرێک به‌شێک له‌ ده‌سه‌ڵاته‌کانی خۆیان بده‌ن به‌ ده‌زگا و دامه‌زراوه‌کانی خوار خۆیانه‌وه بۆ باشتر راییکردنی ئیشوکاره‌کان، بۆ که‌مکردنه‌وه‌ی رۆتین، بۆ خزمه‌تکردنی هاووڵاتییان بێجگه‌ له‌ قازانج چ زه‌ره‌رێکی تیایه‌؟
ئه‌گه‌ر به‌ڕێوه‌به‌رایه‌تییه‌کی گشتی، شاره‌وانییه‌ک، سه‌رۆکی یه‌که‌یه‌کی ئیداریی ده‌سه‌ڵاتی نه‌بێت بچووکترین مامه‌ڵه‌ی هاووڵاتییان راییبکات و خه‌ڵک له‌ دهۆک و سلیَمانییه‌وه‌ بچن بۆ لای جه‌نابی وه‌زیر تا واژۆی کتابێکیان بۆ بکات ئه‌مه‌ له‌ هه‌راسانکردنی هاووڵاتییان و زیادکردنی رۆتینی رۆژانه‌ بۆ ئازاردانی هاووڵاتییان چ هونه‌رێکی ئیداری تیایه‌؟

نووسه‌ری ئه‌م وتاره‌ له‌ 93 - 95 قائیمقامی قه‌زای مه‌رکه‌زی سلێمانی بوو، له‌ سه‌ر لیستی سه‌وز، ئه‌وکاته‌ به‌ڵی ئه‌وکاته‌ش بڕوام به‌ دابه‌شکردنی ده‌سه‌ڵات هه‌بوو. هه‌ربۆیه‌ له‌سه‌ر داوای خۆم و له‌گه‌ل کاک سالار عه‌زیز رێکكه‌وتین که‌ هه‌موو ده‌سه‌ڵاته‌کانی قائیمقام بده‌م به‌ به‌ڕیوه‌به‌ری ناحیه‌یه‌ی قه‌رده‌داخ که‌ ئه‌و‌کاته‌ له‌سه‌ر ئاوه‌دانکردنه‌وه‌بوو. هاوکات کاک سالار عه‌زیزیش هه‌ندێک له‌ ده‌سه‌ڵاته‌کانی پارێزگاری دا به‌ من، چونکه‌ ئه‌و‌کاته‌ من هه‌م سه‌رۆکاری پرۆژه‌ی کاره‌بای سه‌یدسادق-م ده‌کرد، چونکه‌ پرۆژه‌که‌ خۆم مشوری میزانییه‌م له‌ڕێی میدیکۆوه‌ بۆ خواردبوو، هه‌م مه‌به‌ستیشم بوو له‌به‌ر گرنگی ناوچه‌که‌ زوو جیَبه‌جێیبکه‌م. هه‌موو میزانییه‌ی پرۆژه‌که‌ش ته‌نها 88000 دۆلار هه‌شتا وهه‌شت هه‌زاردۆلار بوو به‌ توانای خۆماڵی و کۆکردنه‌وه‌ی که‌ره‌سه‌کانی کاره‌با جێبه‌‌جێمانکرد.‌ ناحییه‌که‌ش نه‌ ده‌که‌وته‌ سنووری ده‌سه‌ڵاتی ئیداری قه‌زای مه‌رکه‌زه‌وه‌.
هاوکات هه‌ندێک له‌ ئیشوکاره‌کانی مه‌رزی باشماخ که‌ بۆ ئه‌و‌کاته گرنگ بوو به‌ من سپێردرا دیسان ئه‌وێش له‌ ده‌ره‌وه‌ی قه‌زای مه‌رکه‌ز بوو شاری پێننجوین بۆخۆی قه‌زایه‌ک بوو.! ئه‌و نموونانه‌ هی وڵاته‌که‌ی خۆمانه‌ پێش سیانزه‌ ساڵێک به‌ر له‌ ئێستا‌!
‌ گه‌ر که‌سێک بیه‌وێت ده‌توانێت له‌نێو ئه‌رشیفی هه‌م قائیمقامییه‌ت، هه‌م پارێزگادا بۆ ئه‌و به‌ڵگانه‌‌ بگه‌ڕێت! ئه‌مه‌ش هۆکارێکی ئه‌رێنی زۆرباش بوو بۆ راپه‌ڕاندنی ئیشوکاره‌کانی ئه‌و یه‌که‌ ئیدارییانه‌‌! دیاره‌ لێره‌دا هێنده‌ی قسه‌م له‌سه‌ر دابه‌شکردنی ده‌سه‌ڵاته‌ له‌و کاته‌ی که‌ براکان ده‌ستیان له‌ خوێنی یه‌کدا بوو! هێنده‌ قسه‌م له‌سه‌ر پرۆسه‌ی ئاوه‌دانکردنه‌وه‌ی قه‌ره‌داخ نییه‌ که‌ دڵنیام هێشتاش زۆرزۆریی ماوه‌ تا به‌ دڵی هه‌موو‌مان بێت!
ئه‌م نموو‌نه‌یه‌م بۆ ئه‌وه‌یه‌ تا ریگا بگرم له‌و ده‌نگانه‌ی ئه‌گه‌ر هه‌بێت و بڵێت گه‌ر خۆی کاربه‌ده‌ست بێت وا ناڵێت! ناکرێت باسی ئه‌وه‌ش نه‌که‌م که‌ ئه‌وه‌ی هانیدام بۆ ئه‌و کاره‌ خاتو کارین ملۆدۆخ ی ژنه‌ ئه‌ڵمانی رێکخراوی میدۆکۆی ئه‌له‌مانی بوو! هه‌ر ئه‌م خانمه‌ به‌ڕیزه‌ش بوو که‌ پاره‌ی پرۆژه‌ی بردنی کاره‌بای ته‌زووبه‌رزی عه‌ربه‌ت- سه‌یدسادق ی بۆ دابینکردین! بۆیه‌ نه‌ک هه‌ر نه‌نگی نییه‌ ئه‌گه‌ر گوێ له‌ پێشنیاری به‌جێ بگیرێت، به‌ڵکه‌ شوره‌ییه‌ ‌گه‌ر گوێی لێ نه‌گیرێت!

وا بۆ 11 ساڵیش ده‌چێت له‌ شارێکی بچووکی سه‌د هه‌زار که‌سی هۆڵاند-دا ده‌ژیم، به‌ درێژایی ئه‌و یانزه‌ ساڵه‌ بۆ هیچ ئیشوکارێک ته‌نانه‌ت بۆ وه‌رگرتنی جنسییه‌ی وڵاته‌که‌ش رێم نه‌ که‌وتۆته‌ هیچ وه‌زاره‌ت و مه‌زاره‌تێک. هه‌موو ئیشه‌کان له‌ڕیی شاره‌وانی شاره‌که‌وه‌ ده‌کرێن. ته‌نها له‌به‌ر ئه‌وه‌ی ده‌سه‌ڵاتیان هه‌یه‌، سیستمی ئیداری ناناوه‌ندییه‌!
هه‌ر شاره‌وانییه‌ک بۆخۆی حکومه‌تۆکه‌یه‌که‌! گه‌لۆ ئه‌م ته‌جروبه‌ نایابه‌ هی ئه‌وه‌نییه‌ چاوی لێبکه‌ین؟

دا‌به‌شکردنی ده‌سه‌ڵاته‌کان، کارکردن به‌ سیستمی ناناوه‌ندێتی، که‌مکردنه‌وه‌ی رۆتین، به‌ گژاچوونه‌وه‌ی فه‌ساد وگه‌نده‌ڵی ئه‌مانه‌ هه‌موویان هێنده‌ی په‌یوه‌ندی به ئیراده ‌و‌ بڕیاری سیاسییه‌وه‌ هه‌یه‌، هێنده‌ په‌یوه‌ندی به‌ راده‌ی گه‌شه‌کردنی کۆمه‌ڵایه‌تییه‌وه‌ نییه‌! بۆیه‌ نابێت ئه‌م داوایه‌ والێکبدرێته‌وه‌ و پێیانوابێت که‌ زیاده‌ڕۆییه‌ ئه‌گه‌ر کوردستان به‌ ئه‌وروپا به‌راورد بکرێت!
له‌سه‌رێکی تره‌وه‌ خۆ‌ ئه‌گه‌ر قه‌راربێت کوردستان‌(دوبه‌ی) بێت! ئه‌وا ئه‌م به‌راوردکردنه‌ش له‌ جێی خۆی ده‌بێت!
هۆڵاند